(RFI) – Gobierno Colombiano a anuncia cu den un par di siman ta bay uni na Bolivia pa pidi ONU saca for di su lista di substancianan ilicito e blachi di coca, confirmando asina e giro di Colombia pa su politica di droga, despues di decadanan di represion contra produccion y consumo.
Colombia ta bay uni na Bolivia pa den proximo simannan pidi retira e blachi di coca di e lista cora di Comision di Estupefaciente di ONU. Laura Gil, vice-minister Colombiano di Asuntonan Multilateral, a haci e anuncio diaranson 22 di februari.
Vice-minister Gil a declara cu su pais kier sigui ehemplo di Bolivia, cu ta purbando di cambia e percepcion di blachi di coca como “sustancia psicoactivo” pa un elemento “di uso tradicional.”
“Pa mas o menos dies aña caba Bolivia a cuminsa un iniciativa pa logra e legalisacion di uso tradicional di coca. Loke nan a haci ta denuncia na Convencion di Estupefaciente,”e vice-minister a declara na prensa Colombiano.
E blachi di coca no a wordo retira pa solicitud di Bolivia di e Lista di Estupefaciente di Convencion Unico di 1961 di ONU, cu ta e lista di substancianan controla pa tratadonan internacional di droga.
Sinembargo, Bolivia a presenta un reserva na 2013 na Convencion di 1961 cu ta permiti kauw, haci te y otro uso no ilegal di e blachi di coca den su teritorio. Despenalisacion di blachi di coca a haci cu Morales a concentra pa comunidadnan Andino na nivel nacional usa e planta di uso ancestral. Su comercialisacion den exterior ta depende di autorisacion di ONU.
