(EFE) – Na Colombia, aña pasa a ser asesina 168 lider social y defensornan di derechonan humano, cifra cu ta supone un reduccion compara cu 197 caso di 2022, lo cual ta refleha “cu den pais e garantianan pa eherce e derecho di defende derechonan humano no ta avansa.”
Asina ta indica e rapport “Puntos Suspensivos,” di e programa Somos Defensores, publica ayera diahuebs y ta revela e cifranan di Sistema de Informacion sobre Agresion Contra Personas Defensoras de Derechos Humanos en Colombioa (Siaddhh).
“Durante 2023 violencia a kita e bida di 168 lider social y personanan defensor di derechonan humano na Colombia, ken for di nan procesonan na diferente teritorio tabata traha pa nan comunidad, pa construi un pais mas husto y na paz,” e documento ta señala.
Incluyendo asesinatonan, den total a registra 765 agresion contra lidernan social y defensornan di derechonan humano na Colombia aña pasa, un cifra inferior di 840 caso registra pa Somos Defensores na 2022.
Sinembargo, e programa ta adverti cu e reduccion “ta importante,” pero no ta representa “un cambio significativo den tendencia di agresion.”
Ademas di 168 asesinato, tabatin 436 menasa, 68 atentado, 35 desplasamento forsa, 20 desaparicion forsa, 11 detencion arbitrario, 11 hortamento di informacion, 8 secuestro, 3 hudialisacion, 3 tortura y 2 agresion sexual, segun e rapport ta indica.
“Disminucion di cierto agresion, pero aumento den otro por relaciona cu un cambio den strategia di actornan arma pa comete violencia selectivo cu ta hiba na realisacion di hechonan cu baha letalidad y cu menos impacto na nivel publico,” ta señala.
Pa genero, e 26,5% di agresion, kiermen 203, tabata contra hende muhe, mientras cu 73,5% loke ta ekivalente na 562 caso, ta coresponde na hende homber.
Liderazgo cu mas a sufri tabata esun di indigena cu 222 caso, despues esun di dirigentenan comunal cu 112, comunitario cu 100 caso y campesino cu 8 caso.
E region mas afecta di Colombia pa agresionnan ta esun conforma pa departamentonan di Nariño, Cauca y Valle del Cauca, na unda guerrilla di Ehercito di Liberacion Nacional (ELN) y un parti di Estado Mayor Central (EMC) e mayor disidencia di FARC, tin presencia.
Den e region aki solamente a registra 326 di 765 agresion contra lidernan social y defensor di derechonan humano cometi rond di e pais. Cauca cu 193 caso, Nariño cu 67 y Valle de Cauca cu 66.
Otro departamentonan cu cifranan halto ta Antioquia cu 89 agresion, Santander cu 49 caso, Bolivar cu 43 y Norte di Santander cu 36 segun Somos Defensores a agrega.
