Presidente saliente Juan Manuel Santos a anuncia cu Colombia lo bira miembro di e Organisacion di Tratado di Atlantico Norte (na Ingles NATO).
Cu esaki Colombia lo ta e prome pais di America Latino cu ta bira miembro di e organisacion, forma principalmente pa paisnan di Union Europeo y Estadonan Uni. E pacto ta encera un compromiso pa defende cualkier di e miembronan cu medionan militar si nan sufri atake di otro forsa.
Segun Santos e formalisacion di e entrada di Colombia lo tuma luga e siman aki na Bruselas.
“E entrada di Colombia den NATO lo mehora imagen di Colombia y lo permiti nos mas presencia riba escenario internacional”, e mandatario a bisa, agregando cu e pais den calidad di “socio global, nos lo ta e unico pais di America Latino cu e privilegio aki.”
Santos tambe a referi na e logro, despues di mas di shete aña di trabao, unda Colombia a keda acepta den e Organisacion pa Cooperacion y Desaroyo Economico (OECD, na Ingles).
Dia 30 di mei proximo, e hefe di estado Colombiano y e secretario general Angel Gurria, lo firma e acuerdo di acceso durante e reunion di e conseho di ministro di e organismo. Banda di e paisnan Europeo y Merca, tin algun economia emergente manera Mexico, Chile y Turkia cu ta miembro di OECD.
E anuncio Colombiano tabatin un reaccion inmediato negativo di gobierno di Venezuela, cu a tilda gobierno di Santos di ta ‘menasa pa paz di America Latino y Caribe’.
E decision di Colombia, e texto ta añadi, ta busca pa intimida otro paisnan den e region.
Na 2016 gobierno Colombiano a acorda caba un cooperacion militar mas estrecho cu NATO, despues di e pacto di paz cu guerrilla di FARC. E convenio cu e pacto Atlantico a ser rechasa e tempo ey pa Venezuela, cu e mesun argumentonan di awor. Despues di su huramento como presidente reelecto siman pasa, Maduro a acusa Santos di prepara “plannan macabro pa laga atras un situacion comprometi di enfrentamento arma” entre Colombia y Venezuela.
