E sacerdote Carlos Arturo Yepes a wordo suspendi di e ehercicio di tur ministerio sacerdotal pa orden di e Congregacion pa Doctrina di Fe di Vaticano, pa denuncianan di presunto abuso sexual.
Asina a confirma e vicario general di Arkidiocesis di Medellin, pastoor Oscar Augusto Alvarez, ken a sigura cu ‘e Congregacion a ordena caba e realisacion di un proceso hudicial penal canonico y a wordo suspendi ad cautelam’.
Na 2018 Arkidiocesis di Medellin a habri un investigacion formal pa Yepes pa e denuncia di un homber di 36 aña cu a sigura cu el a wordo abusa sexualmente ora e tabata mucha, pa e pastoor na aña 1995.
Pa e acusacion aki di abuso sexual a uni denuncianan parecido di otro dos persona, cu a wordo inclui den e buki ‘Dejad que los niños vengan a mi’ di e periodista Colombiano, Juan Pablo Barrientos.
E decision riba Yepes, popular pa su trabou na e canal di TV catolico Televid na Medellin y su videonan na rednan social, a ser firma pa e Papa Francisco y ta di cumplimento inmediato.
A traves di un comunicado Arkidiocesis di Medellin a informa riba e caso di e pastoor, acusa di presunto abuso sexual contra muchanan, cu e Congregacion di Doctrina di Fe ‘a ordena caba e realisacion di un proceso hudicial penal’ di acuerdo cu e Codigo di Derecho Canonico.
Asina mes, a señala cu e denuncia ‘ a procede’ tal como e Ley Canonico ta regarda y como nan ta haci cu casonan similar, cu a inicia cu e proceso debi.
Tambe a sigura cu ‘lo duna siguimento’ pa e disposicion aki ora Gobierno Colombiano autorisa e apertura di oficina di Curia Arkidiocesano, unabes termina e cuarentena decreta pa detene e plamamento di coronavirus.
