Colombia: Varios lider di FARC a aparece cu arma y menasa

Bisti cu pañanan di camuflahe, fuertemente arma y hariendo, asina a aparece e varios lider di “Segunda Marquetalia”, ‘Iván Márquez’, ‘Jesús Santrich’, ‘Romaña’ y ‘El Paisa’, tur di nan firmante di Acuerdo di Paz cu mas di un aña atras a bay back pa e bida di guerrilla y ta purba di rebiba e antiguo FARC.

E imagen ta forma parti di un comunicado publica riba rednan social asocia cu e grupo arma aki, asina como na un cuenta di Facebook crea recientemente na nomber di Ivan Marquez. Den dje ta critica e gobierno di Ivan Duque fuertemente, y nan ta acus’e di ilegitimo y criminal, di kier “kima e pais”.

Nan ta señala e presidente Duque di ta un marioneta di e ex-presidente Alvaro Uribe Velez, cu awe ta den prizon na su domicilio pa un caso di presunto manipulacion di testigonan, riba ken nan ta reclama responsabilidad pa decadanan di violencia paramilitar di Estado y di “sconde simultaneamente su aliansa cu narcotrafico”.

“Gobierno di Duque a destrui e soño mas bunita di e Colombianonan den e principal obhetivo di su strategia. Un par di loco cu ta actua contra sentido comun, cu no solamente ta kima e pais, sino cu ta busca tambe, bou e menasa di Washington, kima e bisindario”, por lesa den comunicado cu a wordo firma pa Luciano Marín Arango (‘Iván Márquez’), Seuxis Paucias Hernández (‘Jesús Santrich’) Henry Castellanos Garzón (‘Edinson Romaña’), Aldinever Morantes, José Vicente Lesmes (‘Walter Mendoza’) y Hernán Darío Velásquez (‘el Paisa’), cu ta firma cu su alias di ‘Óscar Montero’.

“Gobierno actual tin e alma contagia di narcotrafico, di fraude electoral y di cumpra votonan, y nan man ta mancha di sanger”, nan ta sostene.

Sinembargo, den e comunicado nan ta insisti no solamente di critica gobierno, sino di haci yamado pa ciudadanonan mantene riba caya protestando y pa exigi e renuncia di e presidente.

Nan mensahe, cu ta trata di rebiba e luchanan bieu y tuma partido cu demandanan actual social, ta algo ironico pa bin for di clandestinidad di parti di un grupo di homber cu no a cumpli e anhelo di paz di henter e pais.