(Infobae) – Comite Nacional di Welga a anuncia cu no lo detene e convocatorio pa welga nacional despues di retiro di e proyecto di reforma tributario cu presidente Ivan Duque a solicita. Nan a convoca mas mobilisacion y un manifestacion grandi nobo mañan 5 di mei.
“Cu e anuncio aki no ta desactiva e mobilisacion, e hende na cayanan ta pidi hopi mas cu e anuncio aki di retiro”, Francisco Maltes, presidente di e Central Unitario di Trahadonan, a bisa den un comunicado acorda cu tur e central di gremionan y organisacionnan social.
E representantenan di Comite Nacional di Welga a critica cu e mandatario a prepara un reforma tributario nobo y cu no a convoca un mesa di dialogo, cu e fin cu e peticionnan di e manifestantenan lo wordo scucha pa Gobierno nacional.
Nan ta señala cu Ehecutivo a haya oportunidad for di 21 di november di 2019 cu e posibilidad di cumpli cu acuerdonan, pero nunca a dispone pa instala un mesa di negociacion. Al contrario, semper a marca y a actua cu violencia contra e manifestantenan. Aunke den su mannan el a haya e chens pa evita e tragedia aki, e soberbia y no empatia a pisa mas pa no resolve e necesidadnan y urgencia di e poblacion Colombiano.
“E motibonan di e welga no tabata solamente e reforma tributario, e motibonan tin di haber cu e negacion di Gobierno pa negocia e exigencianan di e welga”, Maltes a señala, y afirma cu a wordo rechasa e comienso di conversacionnan pa negocia seis punto di varios peticion cu a pidi den e manifestacion.
E peticionnan ta, ademas di e retiro di e reforma tributario cu a logra kit’e caba, ta e retiro di e ley 010 di reforma di Salud y fortalecemento di e plan di vacunacion masivo; e creacion di un renta basico pa por lo menos tin un salario minimo; defensa di e produccion nacional agropecuario, industrial, artesanal, campesino y apoyo pa empresanan chikito; pagonan escolar cero y rechaso pa un variacion educativo; entre otronan.
