Den un operativo fin di siman pasa, Armada di Colombia a rescata tres presunto narcotraficante cu a naufraga 30 miya nautico for di municipio di Tumaco, departamento di Nariño.
Durante un mision di vigilancia y control maritimo, un unidad di warda costa a mira e tres homber y a inicia e protocol di buskeda y rescate. Ora nan a yega na e zona di naufragio, autoridadnan a haya e individuonan flota riba lama entre paketenan di cocaina.
Prome nan a brinda e prome auxilio y hiba nan na tera firme. Despues nan a hiba e droga na Tumaco. Ora nan a verifica e contenido di e tasnan, nan a determina cu tabata trata di 1.265 kilogram di clorohidrato di cocaina.
“Pa via di e rapido y oportuno accion di personal di Forsa Naval di Pacifico, a traves di un Unidad di warda costa di Tumaco, cu tabata adelanta operacion di vigilancia y control maritimo den awanan di Pacifico Colombiano, y cu apoyo di aeronave di Batayon contra Narcotrafico number 4 di Ehercito Nacional, a haya tres suheto cu tabata na deriva. Di biaha a activa e protocol di buskeda y rescate den lama, cu e proposito di salvaguardia e bida humano. Armada di Colombia a efectua e rescate di e ciudadanonan ora nan a ser auxilia y nan a yega sano y salvo. Ademas di brinda pa nan atencion primario, pa despues nan ser hiba te tera firme”, Armada a indica den un comunicado.
