Rodrigo Londoño Echeverri, presidente di Partido FARC y conoci den su añanan como guerrillero como ‘Timochenko’, a afirma cu un di e principal punto pa trata den e proximo Asamblea General di e colectivo aki lo bay ta e cambio di nomber di e partido, pa motibo cu el a bisa cu no ta coresponde pa e boluntad di paz di e mayoria grandi di persona desplasa.
E proposicion aki no ta algo nobo, ya a wordo sosteni den e prome Asamblea Nacional, pero su proposicion ‘Partido Nueva Colombia’ a wordo derota pa esunnan cu tabata prefera mantene e nomber di FARC, pero cambiando e letranan di ‘Fuerzas Armadas Revolucionario de Colombia’ pa ‘Fuerza Alternativa Revolucionaria del Comun’. E grupo aki tabatin como lider Ivan Marquez y Jesus Santrich, ken a deserta di e acuerdo di paz a tuma armanan bek lansando e ‘Nuevas FARC’.
“Tin cu laga atras e carga historico cu e nomber tin” Timochenko a afirma diadomingo pasa den un entrevista, “Ta realidad asina nos no a kier. Mi ta compronde compañeronan cu ta sinti cu e nomber tin un legado historico, un vinculo sentimental, pero tin un realidad”. El a agrega.
Pa e ex-hefe guerrillero parti di e realidad aki ta cu e nomber tin dificultad cu su rol actual como partido politico, specialmente ora di busca y haya siguidonan nobo, pa motibo cu e nomber FARC ta produci ‘un mensahe basta complica, incluso ta genera distancia ora di bay papia cu un hende’.
E declaracionnan di Timochenko ta produci despues di un polemica den interior di e partido den cual varios miembro a pidi su renuncia den un carta, despues cu e lider di e colectivo no a rechasa e nombramento di Jorge Tovar, yiu homber di e ex-paramilitar Jorge 40, den e coordinacion di e victimanan di Ministerio di Interior.
Den todo caso, Londoño Echeverri a afirma cu e cambio di nomber lo mester ta someti pa votacion den Asamblea di e partido y mester conta cu un bista bon den e mayoria di su delegadonan pa lo por haci efectivo esey. Sinembargo, pa e ultimo comandante en hefe di FARC ta claro cu mester cambia.
