Grupo Interagencial riba Fluho Migratorio Mixto (GIFMM) diamars ultimo a señala cu mester 641 miyon dollar na 2021 pa atende migrantenan y refugiado Venezolano na Colombia, asina como tambe esunnan cu a bin bek na e pais.
E organismo, cu ta forma parti di agencia di Nacionnan Uni, varios ONG y Cruz Cora, a señala cu e suma aki ta fundamental pa ehecuta Plan Regional di Respuesta pa Refugiadonan y Migrantenan cu ta busca “contesta e creciente necesidadnan” di Venezolanonan cu a huy for di su pais y awor ta biba na Colombia.
“Plan di Respuesta ta rekeri e continuo y reciente compromiso di comunidad internacional y sector priva pa contesta e crisis aki”, representante special conhunto cu Oficina di Halto Comisionado di Nacionnan Uni pa Refugiado (Acnur) y Organisacion Internacional pa Migracion (OIM) pa Refugiado y Migrantenan Venezolano, Eduardo Stein a bisa.
Tambe a agrega cu “Refugiadonan y migrantenan Venezolano ta rekeri di nos apoyo colectivo mas cu nunca, tanto den termino di asistencia humanitario urgente como den desaroyo di aproximacion cu ta busca solucionnan sostenibel den largo plaso”.
Segun e datonan di Plataforma di Coordinacion pa Refugiado y Migrantenan di Venezuela (R4V) na november di 2020 tabatin 4.6 miyon refugiado y migrantenan Venezolano den region, di e cual 1.7 miyon ta na Colombia.
Debi na e crisis di pandemia Covid-19, hopi migrante a perde nan sosten economico y a wordo afecta pa haya acceso na nan derechonan y servicio basico, como alimento, awa, saneamento y alohamento.
Ta p’esey cu Plan Regional di Respuesta pa Refugiado y Migrantenan ta busca complementa y fortalece esfuerso di Gobierno pa provee apoyo na salud, alohamento, siguridad alimentario, awa y saneamento, proteccion, educacion y integracion.
Na 2021, e plan ta espera cu por atende 1.8 miyon persona, di e cual 942.000 ta Venezolano cu vocacion di permanencia, 173.000 Colombiano y binacional cu a bin bek, 102.000 persona den transito y 187.000 cu movemento variabel, asina como tambe 395.000 den comunidad di acogida.
