(EFE) – Gobierno Colombiano a reconoce e situacion “grave” di lidernan ambiental na e pais despues cu un rapport di NGO Global Witness a pone Colombia como e nacion mas mortal pa defende naturalesa, cu 79 asesinato na 2023, y agrega cu “esaki no por ta un botin di guera.”

Gobierno ta reconoce e situacion grave cu ta bin for di conflictonan socio ecologico asocia cu narcotrafico, practicanan extra activista vincula cu economia ilicito y e reconfinguracion di conflicto arma,” Ministerio di Ambiente a señala den un comunicado despues di e publicacion di e rapport dialuna ultimo unda tambe a lamenta e “deshonra di e prome luga den asesinatonan” cu Colombia ta ocupa.

Den sentido ey, Ministerio a detaya e trabou cu ta bin haciendo den Gobierno pa disminui y stop e delito aki, den “un strategia integral pa garantisa e bida y seguridad di e personanan defensor di medio ambiente” den cual varios ministerio ta traha, manera esun di Interior y Defensa, hunto cu otro instancianan di estado.

Ademas, e cartera di medio Ambiente “a aumenta e presupuesto aloca pa proteccion colectiva,” mientras cu esun di Interior a aumenta financiamento di Direccion di Derechonan Humano rond di 400%, un placa destina na instalacion di Mesa Nacional di Garantia, unda ta papia di problemanan cu ta caba den asesinato y agresionnan contra defensornan.

Den e pais tin 16 Mesa Teritorial di Garantia activo.

Entre otro accion, anuncia pa Ministerio, a destaca e Acuerdo di Escazu. Recien ratifica pa Corte Constitucional, un mecanismo mediante e cual Gobierno “ta bay sigui fortalece nan herment pa enfrenta e situacion aki y brinda garantia na lidernan den defensa di medio ambiente, debi cu naturalesa y nan defensor no por bira un botin di guera.”

Acuerdo di Escazu ta un tratado internacional e cual tin como obhetivo garantisa e derechonan di acceso na informacion, participacion publico y acceso na husticia den temanan ambiental, asina como tambe protege defensornan di derechonan ambiental den region.

Segun e rapport di Global Witness, na 2023 Colombia a bira un biaha mas e pais mas peligroso na mundo pa defende medio ambiente y naturalesa na unda 79 persona cu tabata eherce e liderazgo aki a muri asesina, un cifra cu ta supone 40% di homicidio di lidernan ambiental na e planeta.

Ademas, e cifra aki ta esun di mas halto registra na un pais for di momento cu Global Witness a cuminsa monitoria na 2012 e menasanan y homicidio di lidernan ambiental.

Den poco mas di un decada, 461 defensor a muri na Colombia, pais cu awor tin e mayor number di asesinato documenta entre 2012 y 2023.

E aña aki Colombia ta anfitrion di COP16, e cumbre di biodiversidad di nivel mas halto, entre otro, ta spera cu lo papia tocante e proteccion di lidernan cu ta defende naturalesa.