Cuatro persona ta permanece trapa bou tera den un mina di carbon na Colombia despues cu diabierna 7 di augustus ultimo un pida di tereno a los.
E mina ta ubica na districto Sogamoso (Boyaca), specificamente na vereda Morca, un sector rural conoci como El Portillo.
Di acuerdo cu habitantenan di e sector, e accidente a presenta diabierna ultimo den oranan di atardi y for di e momento ey organismonan di atencion di desaster den conhunto cu Alcaldia di Sogamoso ta realisa obranan di rescate den e sector.
Ta trata di tres hende homber y un hende muhe cu ta trapa den e pida di tereno cu a los, identifica como Francisco Cuadros, Javier Acevedo, Remigio Alonso Gutiérrez y Luz Alba Bonilla. Aunke e labornan di rescate a cuminsa desde cu e accidente a wordo reporta, ainda no por establece contacto cu nan.
Autoridadnan tambe ta ricibi apoyo di e comunidad Moca cu a ofrece alimento pa e grupo di rescatista. Desde e prome dia nan a baha un tubo na e zona unda nan ta manda cuminda pa obreronan trapa, sin e siguridad cu nan ta ricibi’e.
“Nos a caba di ricibi e ayudo humanitario pa tur e rescatista, y nos lo inicia un plan di rescate. Loke nos sa ta cu e tereno cu a los ta na 150 meter y 30 meter despues nos tin e obreronan”, Catalina Patiño director di Gestion di Riesgo di Sogamoso a bisa.
E funcionario a afirma cu nan ta trahando den conhunto cu Cruz Cora, Agencia Nacional di Mineria, Parnopsa, Oficina di Gestion di Riesgo y Cuerpo di Bombero. El a bisa cu e tereno aki a collapse debi na un faya cu a presenta na base di e luga, loke a laga sin salida e trahadonan.
