(EFE) – Vice-presidente y canciyer di Colombia Marta Lucia Ramirez ayera dialuna a splica cu ainda no tin siguridad tocante cuanto Afgano lo ta yegando na e pais pa su refugio temporal tanten nan lo wordo hiba na Merca ni cuanto nan lo ta, pero el a sigura cu e pais ta prepara pa ricibi nan.
“Na e momentonan aki nos no tin siguridad riba e number precies di e poblacion Afgano cu lo yega na nos pais, tampoco nos sa con nan perfil ta, cuanto hende homber, cuanto hende muhe, cuanto famianan, si nan ta bin cu muchanan…” Ramirez a sigura pa medionan di comunicacion.
E vice-presidente a precisa cu “nos a bin preparando pa sigura cu tur logistica lo ta disponibel pa e momento den cual nos lo haya sa di e yegada di e personanan aki”.
E presidente Colombiano Ivan Duque, diabierna di siman pasa a confirma cu su pais “lo ofrece apoyo na Merca pa e personanan di Afganistan cu nan a duna ayudo pa añanan y cu ta den proceso di haci un registro, un traslado migratorio di e pais ey pa nan lo ta na Colombia temporalmente”.
Cinco ministerio di Gobierno ta traha pa coordina e yegada di e Afganonan pa nan lo sigui cu protocolnan di bio-siguridad y pa sigura, entre otro asuntonan, cu esunnan cu lo yega lo wordo vacuna contra covid-19 ora nan lo yega na e pais, si nan no a haya e vacuna ainda.
“Den caso di status di e personanan aki lo ta un permiso humanitario di caracter temporal, cu no mester di un visa” e canciyer a precisa, tambe a agrega cu “nan ta personanan cu ta den transito pa Merca mientras nan ta haya e visa cu e condicion di refugiado”.
Colombia ta traha pa coordina e luganan na unda nan lo yega pa nan lo ta “comodo” cu su estadia, cu lo ta paga pa Merca y pa nan lo ta na e mesun ciudad, “posiblemente Bogota”.
