Colombia ta pone paro na abuso di ‘fotomulta’

Despues di dos aña di pasa den Congreso, a aproba e siman aki den plenario di Camara di Representante e proyecto di ley cu ta trata di regula e uzo di prueba obteni via material fotografico riba caminda na Colombia.

E sistema aki a converti den algun region di e pais den un lucrativo negoshi, loke a desata un ola di denuncia tocante iregularidad den su implementacion riba careteranan nacional y urbano.

“Nos kier bisa e Colombianonan cu e abusonan a caba, e abuso y asaltonan contra  conductor y propietarionan di vehiculo. Congreso di Republica a tuma e decision di aproba e Proyecto 102 di 2015 y ya no lo sigui instala fotomulta, sin cumpli cu un serie di criterio pa nan uzo,” asina senador Mauricio Aguilar a sigura, ken a lidera e propuesta hunto cu e senadornan Antonio Guerra y Mauricio Lizcano.

Tabatin denuncia cu algun alcalde a haci convenio cu operadornan priva pa instalacion di camara, den cual e operadornan a yega na gana mas cu e propio municipio, yegando den algun caso na 70% pa e operador.

Cu e aprobacion di e proyecto, a determina cu Ministerio di Transporte, na cabes di e Agencia Nacional di Seguridad Vial, lo ta e unico cu por autorisa e funcionamento di ‘fotomulta’ den e diferente caminda y ciudadnan di e pais.

Y pa por acredita su implementacion, esunnan cu ta desea di utilisa e sistema lo mester cumpli cu cierto condicion: respeta e velocidadnan estableci den e Plan Nacional di Seguridad Vial, tin un estudio tecnico cu ta indica cu e ta indispensabel pa coloca e fotomulta, e identificacion di punto critico di probabilidad di accidente y tin un señalisacion adecua, entre otro aspecto.

E ley nobo lo permiti cu e negoshi di algun particular ta termina: e concesionarionan cu ta maneha e fotomultanan lo pasa di ricibi  70% di loke recauda, te solamente 10%. Mientras cu e municipio o ciudadnan unda nan ta funciona, lo haya por lo menos 50%.

“E entidadnan teritorial lo ricibi un cifra considerabel, cu lo mester inverti den plan di seguridad vial cu por yuda pa reduci e inicenan halto di accidente,” Aguilar a señala.