Autoridadnan naval di Panama a intercepta mas di cuatro ton y mey di cocaina den un operativo conhunto cu nan homologonan Colombiano den lama Caribe, unda a captura tambe cinco persona, segun informacion di Marina di Colombia.
Agencia noticiero AFP a relata cu un aviso di inteligencia di Colombia a alerta autoridadnan Panameño encuanto e entrada di lancha rapido den awanan teritorial di Panama, y cu tabata moviendo den direccion di America Central, segun Marina Colombiano den nan comunicado.
“Ora e cinco suhetonan (tur di nacionalidad Colombiano) a nota presencia di autoridadnan naval Panameño, nan a cuminsa tira mas di 90 bulto den lama, pa despues trata di huy, envano, segun e boletin. E 4.575 kilo di cocaina confisca a keda balora na 152 miyon dollar pa autoridadnan.
Colombia ta e principal cultivado di foyo di coca na mundo, materia prima pa traha cocaina, cu alrededor di 169.000 hectar sembra na 2018, segun e informe mas reciente di Organisacion di Nacionnan Uni (ONU).
E pais Suramericano ta produci cerca di 70% di e cocaina cu ta circula na mundo y cu pa gran parti ta pasa via America Central rumbo pa Estadonan Uni, y pa Europa. Exportacion pa Europa ta tuma luga mas tanto cu container for di diferente punto di continente Suramericano, manera e reciente hallazgo di cocaina na Alemania, procedente di Uruguay.
