(Reuters) – Presidente di Colombia, Iván Duque, diahuebs ultimo a descarta e posibilidad di habri back e frontera cu Venezuela pa via di e halto nivel di contagio cu pandemia Covid-19 tin na e nacion petrolero.
Colombia a extende te final di februari e ciere di su fronteranan te proximo 1 di juni, como parti di nan esfuerso pa evita e plamamento di e virus. E pais sur Americano di 50 miyon habitante a cera su fronteranan desde 17 di maart 2020, ora pandemia a cuminsa.
“Mi sa tur urgencia cu e tema di apertura di frontera tin. Pero nos tambe mester ta hopi cauteloso na e momentonan aki cu e situacion di gran incertidumbre y no conocemento riba e crecemento exponencial di e letalidad cu Covid-19 tin aworaki na Venezuela”, Duque a bisa.
Colombia ta e principal destino pa emigrantenan Venezolano cu ta huy di e crisis social y economico di e nacion petrolero.
Actualmente, mas di 1.7 miyon Venezolano ta biba na Colombia, un cifra cu por aumenta den proximo lunanan cu e decision di gobierno di Duque di duna nan un statuut di proteccion temporal pa 10 aña.
E dos pais, sin relacionnan diplomatico y cu ta comparti un frontera practicamente habri di 2.219 kilometer, ta cuestiona nan mes mutuamente.
Mientras Bogota ta acusa di e Gobierno di Nicolas Maduro di tin na su pais lidernan di disidencia di FARC y Ehercito di Liberacion Nacional (ELN) cu tin vinculo cu narcotrafico, Caracas ta señala cu Duque ta haci parti di un plan pa kita e mandatario socialista di e poder cu apoyo di Merca.
Desde cu pandemia a cuminsa mas di 2.6 miyon persona a wordo infecta y 67.199 a muri na Colombia, mientras cu a wordo aplica 3.35 miyon dosis di vacuna contra Covid-19 como parti di e plan di Gobierno pa inmunisa e 70% di e poblacion durante 2021 y logra inmunidad colectivo.
