(EFE) – Por lo menos 300 persona a wordo asesina y 47 mas a wordo secuestra e aña aki na departamento Colombiano di Arauca, frontera cu Venezuela, asina a denuncia Defensor di Pueblo ayera diamars y tambe a alerta cu den ultimo luna tambe 12 ciudadano a disparce di manera forsa.
Defensor di Pueblo den un comunicado a indica cu den aña aki “a registra 300 asesinato den departamento aki, hopi mas cu e 171 cu a wordo registra na 2021”. Igualmente, tin cerca di 19.100 victima di diferente hechosnan, manera e desplasamento forsa, aislamento, menasanan y desaparicion, entre otro.
“E situacion na Arauca ta hopi preocupante. Den ultimo luna tin rapportnan di 12 persona desaparecido di manera forsa, pero di e cifra nos sa cu e ta mayor pa via di e trabou di campo cu nos a haci”, Defensor di Pueblo, Carlos Camargo a indica.
E funcionario tambe a agrega cu e registro di desaparicion por ta mayor, “pasobra e comunidadnan tin miedo di denuncia, nan ta teme pa represalia di gruponan ilegal”.
Den emergencia humanitario aki, Defensor a sigura cu lo sigui acompaña e comunidadnan, specialmente e victimanan, manera nan ta bin haciendo for di januari di e aña aki, debi na aumento di violencia na Arauca.
“Nos ta ofrece un biaha mas nos canal humanitario pa personanan cu no por a bin bek na nan cas, pa nan haci’e” Camargo a manifesta y ademas a pidi na e gruponan arma ilegal pa ricibi e proposicion di paz total cu Gobierno Nacional a haci cu e fin di logra cu habitantenan di e teritorio aki haya un speransa pa logra desaroyo social y economico”.
Arauca ta un departamento petrolero y agropecuario na unda cu for di decadanan a haci mas fuerte e Guera Oriental di Ehercito di Liberacion Nacional (ELN), e guerrilla di mas poderoso, cu awor ta wordo desafia pa Frente 10 di disidencianan, cu a ocupa espacionan cu FARC a laga.
