Mas di 60.000 morto, cerca di 2.3 miyon di persona contagia, miles di persona sin trabou y empresanan den bancarota ta algun di e consecuencianan di e pandemia covid-19 na Colombia un aña despues cu lo wordo registra e prome caso na e pais, na unda e vacunacion ainda ta cuminsando.
Te 6 di maart di 2020 Colombia tabata biba den normalidad, mirando e plamamento di e pandemia na rond di mundo, te ora el a yega na e pais: un muhe di 19 aña cu a bin back for di Milan (Italia) tabata e prome caso positivo y e ora ey tur cos a cambia.
E contagio pa dia a aumenta te ora a bira miles y dies dia despues e prome morto a wordo registra, un taxista di Cartega de Indias. Despues a bin e aumento lihe di e cifranan y awe e pais ta ubica na e luga number 11 pa loke ta trata contagio, cu 2.269.582 y e luga 12 cu 60.300 fayecido.
“60.000 fayecido ta un cifra hopi importante, hopi grandi” Victor Muñoz, director di Departamento Administrativo di Presidencia cu den su funcion tin e responsabilidad di e vacunacion masivo y haci impulso di e reactivacion economico na e pais, a bisa.
Muñoz a sigura cu aunke e cifranan ta halto, e pais a cuminsa prepara prome cu a haya e prome caso y a evita e collapse di e servicionan sanitario.
“A tuma decisionnan hopi importante como duplica e capacidad cu nos tabatin na unidadnan di cuido intensivo. Colombia a pasa di tin cerca di 5.700 UCI pa haya mas di 12.000, e cual a permiti nos enfrenta e parti mas duro di e pandemia”.
Di mesun manera, e funcionario a agrega cu e pais a multiplica e capacidad di haci prueba PCR pa motibo cu haci un aña tabatin un laboratorio so habilita awe ta 165, cu e fin di haci un circulo epidemiologico cu no semper a funciona.
