Awe prome fase di proceso di desarme di tur integrante di FARC ta cuminsa, incluyendo elaboracion di un inventario di arma y destruccion di bala. E proceso a cuminsa awe despues cu su ehecucion a keda atrasa, vocero di gobierno di Colombia a bisa.

“Diaranson ta cuminsa cu proceso di desarma integrante di FARC, cu ta encera un fase di registro di arma, como tambe destruccion di arma cu nan ta yama instabil, y almacenamento di arma di acompañamento tambe” Sergio Jaramillo, alto comisionado di paz, a splica.

Segun programa cu nan a establece despues di firma di acuerdo entre forsa arma revolucionario di Colombia y gobierno na luna di november di aña pasa, guerrilla mester duna ONU un 30% di su armanan riba dia 28 di februari, kier men awe. Pero te na e momento aki algun fase cu mester a cumpli caba, a cuminsa cumpli poco poco, manera estableci. “Nos mester traha un cambio chikito riba prome fase, pasobra e periodo di 180 dia como limite pa logra desarme completo di e grupo di FARC ta manteni den e schema ainda, y cu e cambio ey nan ta kere cu por mantene e resto di e programa manera estableci na cuminsamento.

Manera estableci den e programa, FARC lo por cumpli cu 100 % di desarme na juni, caminda tur arma mester ta den man di Nacion Uni, pa nan posterior destruccion, Jaramillo a splica. El a bisa cu guerrilla y ONU ta cumpliendo desde awe cu un acuerdo special pa logra e desarme di un 30% di arma, cu tabata estableci pa e fecha aki. Proceso di concentracion di mas di 7 mil miembro di FARC den 26 punto di normalisacion, tabata planea pa ultimo dia di december, pero a sucede den luna di februari, pasobra a presenta problema logistico, y esaki a retarda e programa di desarme.

Gobierno y guerrilla a solicita pa mantene e fecha ey di desarme. Jaramillo a splica cu e siman aki, cerca di 1200 miembro di FARC lo tin un resolucion cu a ser firma pa alto comisionado, cu lo permiti na tur hues pa duna amnistia na e guerrillero cu ta acusa di rebelion y otro acusacion relaciona cu mesun causa. Juan Fernando Cristo, ministro di interior a bisa cu cosnan ta cana bon, tambe den otro tema, cu ta contempla den e acuerdo ey.

Congreso ta prepara pa un ultimo debate encuanto institucion di e hurisdiccion special di paz, cu lo husga tur acusacion di delito cu a sucede den ultimo 50 aña di enfrentamento. Cristo a informa cu un acto legislativo ta casi cla pa garantisa cu na momento cu guerrilla laga tur arma, anto lo continua cu suspension di orden di captura pa tur integrante di FARC, cu no por gosa di beneficio di amnistia, y cu mester aparece dilanti di e hurisdiccion special.