(Reuters) – E candidatonan pa presidencia di Colombia diadomingo ultimo a cera nan campaña cu actonan publico masivo pa haya apoyo di votadonan na un siman di eleccionnan den cual lo eligi e proximo mandatario, kende ta bay tin e reto di disminui e mal contento social, violencia y sostene desaroyo economico.
Colombia ta yega eleccion dividi entre temor cu un prome triunfo di iskierda lo aleha inversion y otro logronan economico di e pais, y e preocupacion cu un victoria di centro-derecha lo mantene e situacion actual, caracterisa pa un nivel halto di desigualdad social cu a explota na 2021 cu protestanan antigubernamental, algun di nan cu violencia.
Tur encuesta di intencion di voto ta duna como faborito e iskierdista Gustavo Petro, un economista di 62 aña kende ta priminti reduci e distancia social cu un renta basico pa esnan mas vulnerabel y protege medio ambiente cu e suspension di contractnan nobo pa extrae petroleo y carbon, dos principal producto di exportacion di e pais.
Den e di dos luga di encuesta ta aparece e politico di centro-derecha Federico Gutierrez, ex-alcalde di Medellin cu hunto cu un discurso di unidad ta priminti recupera seguridad, un inversion social mayor pa mehora sistema di salud y di educacion pa genera empleo di e man di empresario- y inversionistanan cu ta apoy’e.
Mas atras di encuestanan cu e intencion di bira un alternativa pa kibra e polarisacion ta e candidato independiente Rodolfo Hernandez, un ingeniero di mas di 60 aña y ex-alcalde di Bucaramanga kende a subi den tur encuesta cu un discurso di man fuerte contra corupcion, un di e principal problemanan di e pais di mas di 50 miyon habitante, exportador di petroleo, carbon, koffie y flornan.
E votacion pa eligi e sucesor di e derechista Ivan Duque lo ta diadomingo 29 di mei. Den e caso cu ningun di e candidatonan haya mas di mita di e votonan valido, manera encuestanan ta pronostica, lo realisa un di dos buelta 19 di juni entre e dos prome.
