Autoridadnan Colombiano na e zona di frontera ta tras e pista di un general di Ehercito di Venezuela, cu lo ta e enlace di un red criminal cu tabata opera na Catatumbo pa trafica droga pa Merca, Mexico, Guatemala y Honduras desde pista clandestino di e pais bisiña.
E siman aki, e Fiscalia a desmantela un red di narcotraficante cu na februari di 2017 y september di 2018, a manda pa Honduras mas di cinco tonelada di cocaina Colombiano desde Venezuela, unda e droga tabata ricibi pa un militar di rango halto di e pais ey, ken ademas tabata coordina e produccion na e teritorio nacional.
E operativo den e cual a ser captura shete persona ta e resultado di dos aña di investigacion di e Fiscalia y e Polis Nacional, despues cu e autoridadnan Hondureño a alerta riba tres barco cu droga Colombiano cu a ser destrui pa nan y otro cu a keda accidenta na su teritorio pa via di sobrepeso.
Dia 14 di september di 2018, entre e ciudad Hondureño di El Progreso y San Pedro Sula, a ser captura dos persona cu tabata forma parti di e red, kende na e momento tabata transporta 464 kilo di cocaina na un truck tipo grua.
Despues di haci siguimento pa e banda criminal, autoridadnan Colombiano a logra establece cu e cocaina tabata procesa na laboratorio propio ubica na La Gabarra, zona rural di Tibu, un di e municipio di Catatumbo, departamento di frontera di Norte di Santander.
E droga a ser saca riba camindanan ilegal ora e general Venezolano a ricibi pa embarca nan via Centro America.
