(AFP) – Presidente di Colombia, Gustavo Petro ayera diabierna a pidi pa investiga y atende e victimanan di presunto violacion di muchanan menor di edad na man di militarnan local y Mericano na Amazonia, despues cu un investigacion periodistico a bira conoci.
“Mi a pidi un comision di Instituto Colombiano di Bienestar Familiar y Presidencia pa bay na Guaviare y atende e denuncianan di violacion di muchanan menor di edad. Esaki a tuma luga pa añanan caba stimula pa inmunidad. Ta bay cuminsa cu investigacionnan, incluyendo e negligencia di e funcionarionan”, e mandatario a bisa.
Den un investigacion di Univision Noticia na december a revela cu un militar di Merca cu “tabata bibando den un instalacion di un batayon” di ehercito Colombiano na 2019, supuestamente a abusa sexualmente y a laga na estado un mucha muhe indigena nukak di 10 aña na San Jose di Guaviare, un ciudad scondi den Amazonia Colombiano.
Apoya den fuentenan di comunidad y entidadnan di Estado, e noticiero Mericano a denuncia “un aumento di fenomeno di violacion di indigenanan menor na region di Guaviare, cometi den nan mayoria pa varios homber blanco adulto, algun di nan militar.”
Fiscalia ta investiga denuncianan contra di soldadnan Colombiano y “Mericano” pa abusa di muchanan nukak, segun e fiscal Isabel Leon a indica na e noticiero.
Embahada di Merca na Bogota den un comunicado a manifesta cu su trupanan no tabata ubica na Guaviare na 2019, tempo cu presuntamente e abuso a sucede.
Segun presidente Petro, “ta 118 miembro di ehercito” di Colombia esnan cu ta siendo investiga.
Indigenanan nukak a bin bandonando nan teritorio memey di conflicto arma Colombiano for di fin di siglo 20. Awe nan ta biba den estado vulnerabel sin recursonan economico y den e zonanan rural unda nan ta biba riba caya pidiendo ayudo.
Hopi mucha y hoben di e etnia ta caba den man di rednan cu ta ofrece nan cuminda a cambio di fabornan sexual y algun di nan a cay den droga, segun diferente ONG a bisa.
