Senado Colombiano a aproba den un debate ultimo un ley nobo cu ta busca regula e cantidad y consumo di estupefaciente y substancia psicoactivo den espacionan publico, specialmente na parkenan y alrededor di scolnan, unda a keda prohibi.
E iniciativa a surgi despues di e fayo polemico di e Corte Constitucional e prome dianan di juli, cu a despenalisa consumo den espacio publico y su prohibicion general, loke a converti Colombia na e di dos pais na America Latino cu ta permiti e consumo di droga den espacio publico.
E sentencia ey, cu a elimina dos prohibicion di e Codigo di Polis riba e consumo di droga, a laga un espacio huridico bashi den e politica di droga, cual a pretende di remedia cu e ley nobo aki, cu ta reforsa sancion pa e consumidor y ta prohibi posesion of consumo, hasta e dosis personal, den parkenan of cercania di scolnan.
E iniciativa promovi pa e Senador di Cambio Radical di partido derecha, Rodrigo Lara, ta entrega facultadnan pa Alcalde y Gobernador pa delimita e distancia pa e restriccion di cantidad y consumo, ademas, a duna poder pa e Conseho y Asamblea regula e consumo di e substancianan aki na zona comun di e propiedad horizontal.
E promotor di e ley ta afirma cu e no ta busca rebiba e penalisacion di droga, cual a ser elimina pa via di e sentencia C- di 1994 di e Corte Constitucional, sino pa establece un control pa evita cu droga lo por ta bendi na scolnan y lo por afecta e hubentud.
Loke ta falta di e ley ta e sancion di parti di Presidente Duque pa por drenta na vigor y ainda mas amplia e legislacion grandi riba droga na Colombia, cual no ta laga di ta contradictorio.
