E denomina ‘Linea duro’ di ELN, cu ta nenga pa un salida negociabel di e conflicto, a fortalece despues di e suspension di varios combersacion cu Gobierno Colombiano, e control di economia ilegal a aumenta y ta consolida e influencia di e guerrilla na Venezuela, Fundacion Ideas para la Paz (FIP) a alerta ayera diahuebs.
E fortalecemento aki lo por implica un ‘debilidad den e linea politico, cu por keda depende di e economia ilegal dinamico’, FIP a afirma den un informe yama ‘Que hacer con el ELN? Opciones para no cerrar la puerta a una salida negociada’, den cual ta analisa e distinto escenario despues di considera cu e derota militar ‘no ta un opcion’ y e dialogo ta ‘improbabel’.
E informe ta calcula cu na 2017 so den e guerrilla ey ‘mil miembro a uni y segun calculonan reciente di Fuerza Publica, pa 2018 tabata conta cu mas di 4.000 integrante’, loke a nifica cu Ejercito de Liberacion Nacional (ELN) a bira e grupo arma ilegal mayor di Colombia.
Pa e fundacion, e ,fortalecemento di ELN ta evidente,’ como tambe su expansion den e region na unda prome no tabatin presencia, aunke su ‘dimension politico y social no ta refleha den e cifranan’.
ELN a expande pa varios region durante decadanan domina pa esun cu awe a keda desmobilisa FARC, como na departamento di Antioquia, Bajo Atrato na Pacifico y algun zona di Nariño.
“ELN mester considera cu seriedad e condicionnan fiha pa Gobierno pa habri espacio pa un fase di exploracion nobo”, FIP a referi pa e exigencianan di presidente Duque pa e grupo aki renuncia na tur actividad criminal, incluyendo secuestro, y libera e personanan cu tin den su poder.
