Shete persona a wordo mortalmente herida ora nan tabata den un bar yama Las Margaritas, situa na e vereda La Estrella, entre e municipionan Yarumal y Angostura (Norte de Antioquia). E masacre a tuma luga diadomingo anochi y autoridadnan ta trahando ainda pa determina si tin mas victima o persona herida.
Coronel Carlos Mauricio Sierra Niño, comandante di e Departamento di Polis di Antioquia, a splica cu cinco homber arma a drenta na e establecimento y a cuminsa tira indiscriminadamente riba e personanan cu tabata eyden.
Despues di conoce e hecho, personal di investigacion criminal y unidadnan di inteligencia a yega na e luga, cu apoyo di ehercito.
Un comision di experto di e direccion di investigacion criminal di polis (Dijin), bao mando di coronel Wilson Pardo, a bay dialuna di Bogota pa Medellin pa apoya e investigacionnan.
Den un prome hipotesis autoridadnan ta atribui e accion arma na e enfrentamento cu tin entre e organisacion guerrillero ELN y integrantenan di e clan Usuga pa control di cultivo ilicito. No tabatin ainda informe encuanto e identidad di e victimanan, cu lo tabatin conexion cu e clan; tampoco no conoce ainda nan edad ni sexo. Durante dia di ayera autoridadnan tabata trahando riba esaki.
Den seno di e secretaria di gobierno di Antioquia lo a realisa un conseho di siguridad den e zona pa determina e medidanan cu mester tuma.
