(EFE) – Ultimo hefe di FARC, Rodrigo Londoño, alias “Timochenko” a reconoce ayera den un audiencia publico na Bogota e responsabilidad di e mando di e guerrilla desmobilisa, unda tabatin secuestro y asesinato di cilvil, militarnan y polis cu a ser cometi den e conflicto arma.
“Mi ta bin den calidad di ultimo comandante di FARC y miembro di e direccion maximo pa reconoce adopcion y ehecucion di politica di secuestro” Londoño a expresa den un audiencia publico convoca pa Hurisdiccion Special pa Paz (JEP) na biblioteca Virgilio Barco Vargas na Bogota.
Hunto cu Londoño tabata Pablo Catatumbo Torres, Pastor Lisandro Alape Lascarro, Milton de Jesús Toncel, Jaime Alberto Parra, Julián Gallo Cubillos y Rodrigo Granda Escobar, tur di nan miembro di e ultimo secretariado di FARC, maximo organo di e guerrilla aki y e personanan responsabel di e accionnan di e grupo arma.
Londoño a agrega den e declaracion cu el a lesa cu nan “ta asumi nos responsabilidad colectivo den un di e pio crimen cometi pa nos organisacion fruto di un politica cu a causa crimen di lesa humanidad y crimen di guera”.
Na e audiencia tambe a asisti victimanan di e personanan secuestra cu a pidi husticia y no ripiticion.
Investigacion di JEP ta indica cu e ordennan di secuestro a orienta den forma generalisa na personanan di tur statuut social y den e practica nan no a distingui teritorionan, condicion di genero, edad of vulnerabilidad special.
JEP a habri e caso number 1 dia 04 di juli di 2018 y den su proceso di investigacion a logra identifica 21.396 victima di secuestro cu nan nomber y cedula.
E audiencia di reconocemento aki cu a cuminsa ayera lo extende te mañan cu lo informa tocante e imputacion di cargo, ora JEP lo acepta su reconocemento y lo emiti un condena, dependiendo di e grado di berdad y aceptacion di culpa cu nan lo admiti.
