Despues di casi un aña, Bogota a cuminsa experimenta ayera e regreso na les semi-presencial na scolnan oficial. Pa cuminsa lo ta ocho establecimento educativo, segun Secretaria di Educacion di e Districto, pero poco poco mas institucionnan lo uni pa loke Administracion a denomina un reapertura “gradual, progresivo y sigur”.
Siman pasa caba a wordo autorisa e mesun proceso pa mas di 500 scol priva y crèchenan, cu a wordo habilita pa ricibi muchanan di e prome klasnan, un bes a cumpli cu tur e rekisito di bio-siguridad, como dos meter di distancia den klas, bañonan separa, ventilacion, tuma di temperatura y elementonan di proteccion personal, entre otro. Te diabierna, 124 di nan y mas di 9.200 alumno a bay back na su scol.
Den e caso di scolnan publico di Bogota, alrededor di 138, di un total di 400, actualmente ta cumpli cu e mesun condicionnan. Varios di nan tabata den un plan piloto na final di aña pasa pa un reinicio sigur. E alcalde Caludia Lopez a anuncia cu proximo siman mas scolnan lo cuminsa cu e proceso di forma gradual.
E regreso semi presencial na scol tabata yen di polemica. Sindicatonan di maestro di Districto ADE y Fecode a expresa su rechaso na e medida pa motibo cu nan ta considera cu ainda no tin e condicionnan di siguridad pa alumnonan y maestronan. Incluso diabierna ultimo nan a haci un protesta chikito dilanti di Alcaldia Mayor, aunke no tabatin hopi hende.
Pero alcalde no a cambia di opinion y a enfatisa cu “Nos obligacion ta pa prepara y ta cla pa ricibi por lo menos un mucha cu lo mester di les presencial”.
