(NTN24)- Juan Manuel Santos, presidente di Colombia, lo haci un bishita oficial na Brasil diamars venidero, pa combersa cu su homologo Michel Temer y lo asisti tambe na un encuentro cu empresario di ambos pais.
Segun su agenda preliminar, Santos ta pa yega e capital Brasileño dialuna nochi, y su agenda oficial lo inicia e dia siguiente, ora e ser ricibi pa presidente Temer na palacio presidencial di Planalto.
Den e agenda cu e mandatarionan lo trata ta figura, ademas di cuestion comercial y economico bilateral, e situacion di Venezuela y, en particular, e impacto cu na ambos pais e ola migratorio fuerte tabatin, causa pa e crisis profundo na e pais aki.
Na Colombia ta calcula cu den ultimo dos aña a drenta cerca di 500.000 Venezolano, mientras cu na Brasil e cifra aki ta 40.000, di acuerdo cu e ultimo datonan oficial.
Durante su estadia na Brasilia, Santos tambe tin programa participa na un seminario encuanto asuntonan comercial y economico cu ta reuni empresario di ambos pais y lo ta organisa pa e Agencia Brasileño di promocion di exportacion y inversion (APEX).
Tambe e lo asisti na un evento tocante tratamento y cuido di mucha di prome infancia, un asunto den cual Santos a concentra parti di su administracion durante e periodo di gobierno cu ta termina na augustus proximo, ora e entrega cargo na e ganado di e eleccion programa pa 27 di mei.
