(NTN24) – Diaranson ultimo, centenares di reservista di Ehercito y Polis di Colombia a reuni na Plaza Bolivar di Bogota, Colombia, pa celebra e “Dia di Heroe” y tambe pa protesta contra Gobierno di Gustavo Petro.
“Nos ta bay marcha cu e heroenan di reserva, pa bisa Gobierno cu Colombianonan, soldaatnan y polis di e patria aki tin e mesun causa: Colombia den libertad. Nos ta topa na e principal plasanan di e pais!” nan a indica riba rednan social.
Mester destaca cu e manifestacion aki a tuma luga un dia prome di e celebracion di Independencia di Colombia ayera 20 di juli, na unda algun di nan no a participa.
“Pa prome biaha den historia, Reserva y Veteranonan cu honor, no ta bay participa den desfile. Pasobra tin un desgobierno, tin un violacion di respet y honor militar y policial. Nos no ta bay rindi homenahe na un presidente cu e mes a viola Forsa Publico y pensionadonan,” Jose Espinosa, miembro di Reserva Activo a bisa.
Varios politico di oposicion a uni na e manifestacion aki apoyando e forsa publico.
Igualmente, ayera 20 di juli a tuma luga diferente protestanan unda nan participantenan a cana na diferente ciudad di e pais pa asina mustra su apoyo na presidente Petro pa su reformanan y proposicionnan.
Di e forma aki, e pais no solamente tabata testigo di e desfile militar cu tabatin na San Andres pero tambe posesion di Congreso y apoyo na presidente Gustavo Petro.
E manifestacionnan a haya promocion di Central Unitario di Trahadonan y Federacion Colombiano di Trahadonan di Educacion.
Central Unitario di Trahadonan a menciona cu e idea di e mobilisacion tabata pa brinda apoyo na reforma laboral, salud y di pension, nan ta relaciona esey cu e derechonan y husticia social.
