(EFE) – Reina Maxima di Hulanda ayera diamars a reuni cu e presidente di Colombia, Gustavo Petro, den marco di su bishita como asesor special di ONU na unda a papia di inclusion social di teritorionan exclui y di creditonan popular.
E reina, ken ta un asesor special di secretario general di Nacionnan Uni riba Inclusion Financiero pa Desaroyo (UNSGSA, na Ingles), a ser ricibi na Cas di Nariño, sede presidencial, pa e prome dama y casa di Petro, Veronica Alcocer, ken tabata presente den e reunion cu e delegacion di ONU cu ta acompaña e monarca y e delegacion di Gobierno Colombiano.
Durante e encuentro “nan papia riba sistemanan di pagonan y nan importancia den e inclusion social di personanan di teritorionan exclui” segun e despacho di e mandatario a señala den un comunicado.
Tambe a papia di avancenan den e uso eficiente y productivo di creditonan popular, e conectividad y cultura di pagonan, pa logra un inclusion financiero mayor na e pais.
E agenda di Maxima di ayera na e capital Colombiano tambe a inclui un encuentro cu minister di Hacienda, Ricardo Bonilla, y e vice-minister di Relacionnan Exterior, Francisco Coy, ken a evalua avancenan cu Colombia a haci den ultimo 10 aña den materia di inclusion financiero.
“Colombia a haci un trabou hopi importante den sector aki,” Maxima a destaca na Ministerio di Hacienda, na unda a haci un joke cu minister tocante e flornan, un di e mercadonan principal di e pais.
Tambe a destaca cu “inclusion financiero no ta un fin riba su mes, ta un herment pa haya hopi cosnan,” mientras cu a señala cu Colombia ta sigui haya desafionan tocante cu “solamente 13% di e Colombianonan ta logra spaar den un cuenta formal,” credito priva te ainda ta hopi abou y ta existi “importante” buraconan pa loke ta trata genero.
E jornada di e asesor special di ONU tambe a inclui un encuentro cu gerente general di Banco di Republica, e autoridad monetario di e pais, Leonardo Villar Gomez, y superintendente financiero Cesar Ferrari.
E recorido di e reina diamars ultimo a finalisa cu un encuentro cu e vice-presidente Colombiano, Francia Marquez.
E bishita di Maxima pa Colombia ta bay finalisa awe cu su participacion den un evento tocante pagonan pa inclusion financiero organisa pa Colombia Fintech.
Prome cu su paso na e capital, e monarca a bishita Medellin, na unda a destaca e progresonan di Colombia den inclusion financiero despues di a recore unidadnan productivo di e ciudad Colombiano.
Eynan, e casa di rey Willem Alexander a recorda e biahe cu el a haci 10 aña pasa na Colombia tambe den su rol como asesor special di ONU.
“Na e tempo ey, inclusion financiero di Colombia tabata rond di 40% y awe ta riba 93%, e monarca a sigura.”
