(infobae) – Evidencia cu autoridadnan a compila tocante asesinato di DJ Valentina Trespalacios ta keda señala e Mericano, John Poulos como posible culpable. Entre e documentonan parti di e dossier den man di fiscalia tin e carta di autorisacion di entrada na e edificio unda Poulos a huur un apartamento na Bogota, como tambe e declaracion di un persona cercano na e DJ.
Den e carta dirigi na e administracion di e edificio, publica pa Noticias RCN, e doñonan di e apartament ta solicita autorisacion pa solamente tres dia pa Poulos y Trespalacios, di 19 te 22 di januari ultimo.
Segun Fiscalia, e prueba aki ta indicio cu Poulos lo por a drenta e pais cu intencion di ehecuta e asesinato di Treslapacios, door di huur e apartamento pa tres dia so.
Na esaki ta suma e declaracion di un persona cercano na Trespalacios kende a bisa autoridadnan cu e tabatin un relacion romantico cu e DJ desde januari 2022. Den e declaracion, e homber a bisa cu mirando su cercania cu Valentina, desde cu a crimen a bira conoci el a haya varios yamada puntrando pa e DJ y si nan tabata hunto.
El a confesa cu no tabata sa nada di morto di Valentina te cu den un yamada un persona a bis’e cu a haya Trespalacios morto na Fontibon.
Den e declaracion e homber a sigura cu diabierna 20 di januari el a papia cu Valentina y el a confirm’e cu lo hiba su cosnan na e apartamento nobo y no tabatin mester di ayudo pasobra un amigo lo busk’e.
Pa autoridadnan, e datonan cu a entrega den e declaracion ta klop cu e hechonan, ya cu e homber a sigura cu pasa 6:28 di atardi, Valentina a confirma cu ya a busk’e pa bay e apartamento nobo, y segun camaranan di seguridad di e edificio, Poulos y Trespalacios a yega e sitio pasa di 7:18pm.
