(AP) — Presidente Colombiano ta haciendo un yamado riba su compatriotanan trahando sin status legal na Merca pa bandona nan trabao y bolbe cas lo mas pronto posible.
“Rikesa ta produci solamente pa e pueblo trahador,” Gustavo Petro a bisa den un post riba X mainta trempan. “Ban construi rikesa social na Colombia.
E presidente iskierdista a bisa cu su gobierno lo provee prestamo na esnan cu acepta su oferta pa bolbe cas y registra den un di su programanan pa cuminsa un negoshi.
Petro a haci su comentarionan despues di un disputa fuerte riba inmigracion weekend ultimo cu presidente Mericano, Donald Trump cu casi a impulsa un guera comercial y un ruptura den relacion diplomatico entre Merca y su aliado historico na Sur America.
Petro, den un tormenta anterior riba rednan social, a acusa administracion di Trump di maltrata migrantenan kende a drenta Merca ilegalmente door di pone nan na boei y saca nan riba vuelonan militar pa Latino America. Trump a explota ora Petro no a duna e vuelonan aki permiso pa aterisa.
Despues, e dos banda a negocia un tregua memey di protesta di inversionistanan cu Petro tabata sabotiando economia di exportacion Colombiano, cu ta depende hopi riba compra for di Merca.
Colombia a acepta 475 vuelo di deportacion for di Merca di 2020 pa 2025, na di cinco lugar tras di Guatemala, Honduras, Mexico y El Salvador, segun Witness at the Border, un grupo defensor cu ta track datonan di vuelo. A acepta 124 vuelo di deportacion na 2024.
