(NTN24) – Presidente di Colombia Gustavo Petro dialuna ultimo a desmenti e declaracionnan di su ruman homber, Juan Fernando Petro, ken ta sigura cu e mandatario hunto cu su persona, a ser diagnostica cu Asperger Syndroom for di tempo nan tabata hoben.
Petro a traves di un mensahe riba e red social “X” a reitera cu e no a ricibi e diagnostico ey y a splica cu tabata na 1994 cu e condicion aki a ser diagnostica pa prome biaha.
“Tin cosnan cu mi no ta compronde entre prensa y mi famia. Pero esaki a laga mi boca habri.” E hefe di Estado Colombiano a skirbi.
“Algo ta pasa cu mi ruman. Hamas mi a ricibi un diagnostico pa Asperger Syndroom. Ta imposibel cu nan por a diagnostica esey na nos ora nos tabata mucha pasobra e condicion ey a ser diagnostica na 1994 ora mi tabatin 34 aña di edad y a sali for di e tratadonan di diagnostico na 2013, pasobra e ciencia a rechasel’e como un malesa specifico,” el a agrega.
Durante un entrevista den e programa Los Informantes, Juan Fernando Petro, a sigura cu e diagnostico a ser haci ora nan tabata hoben.
“Ora nos tabata hoben, nos tabata personanan hopi leuk. Ora adolescencia a cuminsa tabatin un cambio grandi den su persona y den mi. Mi tata a hiba nos na psicologo y e psicologo a bisa cu nos tabatin e syndroom di autismo: Asperger”, Juan Fernando Petro a bisa.
“Tin momentonan cu nos por ta cu 10.000 persona, pero di un momento pa otro, nos no t’ey mas, aunke nos ta fisicamente. Den caso di Gustavo ainda e ta mas intenso cu esun di mi.” E ruman homber di e mandatario a destaca.
E palabranan aki di e famia di e presidente a agita e debate cu cuestionamento di parti di oposicion pa estado di salud di e mandatario, debi na incumplimento constante di su agenda oficial y ausencia polemico na compromisonan importante di su labor.
