(Infobae) – Ayera 27 di januari for di Cartagena, na unda ta desaroya e Foro pa Progreso di America di Sur, e presidente Ivan Duque a haci un yamada na Gobierno di Cuba pa extradita e lidernan di ELN cu ta den e isla ey, y ademas a rechasa e atentadonan terorista di e grupo guerrillero na teritorio Colombiano.
Den su intervencion cu prensa, e mandatario a probecha pa califica di “miserabel” y “cobarde” e atakenan terorista reciente di ELN contra un cuartel militar na e pais y a adverti cu e atentadonan aki no lo “limita” e capacidad di actua di Estado contra structuranan criminal.
Duque a reitera cu e grupo terorista aki no a demostra boluntad di paz y cu e “desaster cu ELN” a causa, su gobierno a contesta cu “firmesa di institucionnan”.
Tambe e presidente a destaca cu “tin un rechaso claro tocante e actonan cobarde aki di terorismo di ELN” y a enfatisa cu lo sigui enfrenta e grupo ilegal aki y a finalisa bisando cu: “Colombia no lo pone den rudia”.
Igualmente a indica cu, “nan kier hunga un papel den eleccionnan y pa trata di faborece cu e proximo gobierno lo yega di rudia na nan. Esey no lo pasa, Estado di derecho aki ta mas fuerte cu nunca”.
Hefe di Estado tambe a yama atencion riba e presencia di fenomeno di terorismo den e paisnan miembronan di Prosur, pa lo cual ta vital e colaboracion entre gobiernonan, forsanan publico y institucionnan di husticia di e nacionnan.
Duque a insisti cu narcotrafico a purba di desestabilisa e prisonnan na Ecuador, comete secuestronan na Paraguay y reorganisa gruponan arma na Peru, mientras den barionan di ciudadnan di paisnan como Chile, Guyana y Surinam e microtrafico a bira un menasa.
