(Infobae) – Ayera 8 di april den oranan di mainta, presidente Colombiano Ivan Duque Marquez a informa riba su cuenta di Twitter cu a firma e proceso pa cu Dairo Antonio Usuga David, alias “Otoniel” hefe maximo di Clan del Golfo, lo wordo extradita pa Merca.
“Ma caba di firma e extradicion di alias “Otoniel”, e pio narcotraficante y criminal den historia reciente di Colombia. Institucionnan di e pais ta mustra nan fortalesa y contundencia”, e hefe di estado a sigura.
No ta prome biaha cu Duque ta referi na extradicion di e criminal cu a wordo captura na final di 2021 pa Ehercito na Uraba antioqueño.
E presidente a haci enfasis cu “Otoniel” no solo lo responde pa autoridadnan internacional, sino tambe pa esun Colombiano. Esaki, despues cu varios sector a cuestiona na Gobierno nacional, pa motibo cu supuestamente, no lo a permiti cu e criminal lo presenta na husticia di e pais.
Di su parti, director di Polis, general Jorge Luis Vargas, a sigura cu den un par di dianan lo haci e traslado y den e mesun sentido e mandatario a indica cu lo ta den e menor tempo posibel.
“Lo ta cuestion di dianan pa cumpli cu e mandato di Corte Supremo y cu señor presidente di Republica lo manda e na e cortenan di Merca, na unda e ta solicita pa tres corte di e pais ey, pa delitonan relaciona cu tonelada grandi di narcotrafico”, e director a comenta y na mesun tempo a destaca cu “Otoniel” tabatin negoshinan cu e cartelnan mas poderoso di mundo.
