(Semana) – E reforma polemico di salud na Colombia ta birando un debate cayente, un discusion cu casi ta cuminsa na Senado; den e sentido ey, presidente di e Republica, Gustavo Petro, den un defensa nobo na su iniciativa, a lansa un golpi fuerte contra e derecha extremo.
A traves di su tribuna faborito, su cuenta personal di “X”, e mandatario Colombiano a acusa “derecha” di sabotia e reforma controversial di salud.
“Derecha Colombiano ta bisa cu tin cu duna mas placa publico na e bari sin fondo cu nan a construi for di 1993 y nan ta yama sistema di salud,” Petro a skirbi.
El a continua bisando: “Nan a construi un sistema di intermediacion priva di recursonan publico pa construi un mercado di salud cu a laga e red publico hospitalario di henter e pais destrui y e mayor parti di e poblacion sin e atencion adecua.”
Tambe el a bisa cu “nan a converti e presupuesto den un sistema simpel di transferencia di recursonan publico na e sector mas rico di e pais: e berdadero cartel nacional di contractnan. Di otro banda, nos tin hende sin derecho na salud, pension, educacion, sin derecho pa simplemente biba den un di e paisnan mas desigual di e tera cu a construi.”
Ademas, a trece dilanti cu “si boso ta suma e transferencianan publico cu ta haci na EPS, cu transferencia publico pa fondonan priva di pensioen, cu tambe a keda agota, cu concesion di careteranan deficiente, cu e deficit di comercialisador electrico, cu transferencianan na fondo di stabilisacion di combustibel pa subsidia gasolin y diesel, e gran deficit di presupuesto cu a crece pa financia Covid cu debe publico, e ora ey boso ta bay haya sa cu finanzas di estado ta a punto di collapse.”
Pa finalisa, el a señala cu “p’esey nos a propone un acuerdo nacional den cual nos ta dicidi. No ta pa mete mas personal of famia den Gobierno of pasobra nos tin miedo di derecha extremo violento, of pa detene e reformanan, ta pa transforma loke no ta sirbi mas y pasa un fase mas husto y productivo como sociedad humano,” el a finalisa.
