Riba su cuenta di Twitter, e presidente di Colombia Ivan Duque a confirma ayera diamars e porcentahe di aumento di salario minimo na e pais, e cual lo dicidi e aña aki cu decreto presidencial.
Segun informacion revela pa e mandatario y den concordancia cu loke expertonan a adelanta riba e tema, e aumento lo ta di 3.5%.
Di acuerdo cu e aumento, e suma adicional cu lo agrega pa 877.803 peso lo ta di 30.723. cu esaki, e salario base di Colombia lo yega na 908.526 peso mas auxilio di transporte di 106.454 peso. Segun e prome mandatario, esaki lo a trata di e prome bes den historia di Colombia cu e cifra ta supera e miyon di peso acumula, ubica na 1.014.980 peso.
30.723 peso lo a coresponde pa un aumento di cerca 1.000 peso pa dia. Kiermen, e Colombiano promedio no lo por adkiri un pasashi di TransMilenio cu e aumento pa dia. Sinembargo, ta un proyeccion positivo pa via di e ciere di palabracion entre gremionan y central obrero 15 di december ultimo.
“Ta necesario mantene e ekilibrio entre poder di adkisicion y protege y genera empleo nobo”, Duque a splica, den concordancia cu e debate entre fortalecemento di entrada pa e Colombianonan y recuperacion di empleonan despues di e crisis causa pa e pandemia di Covid-19.
Minister di Trabou, Angel Custodio Cabrera, a hustifica e aumento reduci di e situacion causa pa pandemia. “Nos ta bibando un situacion critico na unda subi e 3.5% ta compleho, pero nos ta compronde e dificultad di yega pa mas di un miyon peso, incluyendo transporte. No ta e hecho cu aumento ta importante pero si ta un avance y nos ta espera cu por recupera e economia”, e funcionario di Gobierno a bisa.
