Autoridadnan di salud publico na Colombia a evalua e caso di un pasahero di nacionalidad Chines cu a yega Colombia diaranson riba un vuelo procedente di Turkia y cu por tabatin e sintomanan di e coronavirus nobo. Finalmente ayera a descarta e posibilidad cu e persona tabata infecta cu e virus.
E stranhero na su yegada a ser traslada inmediatamente pa un clinica na parti occidental di capital Bogota, unda ta realisa e examen necesario pa determina si e tin e virus of no.
E coronavirus, cu a aparece prome na China, a causa te awor 17 morto y a contamina centenares di persona, segun un ultimo informe haci dia 22 di januari locual a causa preocupacion cu propagacion di e virus por expande rapidamente, loke por ocasiona cu Organisacion Mundial di Salud (OMS; WHO) lo decreta un “emergencia internacional”.
A traves di un comunicado ministerio di Salud y Proteccion Social di Colombia ayera a sigura cu no a confirma presencia di e virus cerca e persona. A realisa un chekeo riba dos biahero cu a biaha via China.
E prome caso a presenta dia 19 di januari; ta trata di un pasahero cu tabata riba un crucero na Asia y tabata presenta sintoma di Infeccion Respiratorio Agudo Grave (IRAG). Despues di e chekeo medico a logra descarta cu tabata e coronavirus (nCoV).
E segundo caso a ser registra diaranson pasa; esaki tabata un persona procedente di Istanbul, cu manera menciona a pasa den e pruebanan concerni na un clinica na Bogota. Autoridadnan di aeropuerto a divulga cu despues di a baha e pasaheronan di e avion, a pasa pa desinfecta esaki completamente.
Autoridadnan di salud publico a notifica personal medico cu ta atende persona cu sintoma cu por indica presencia di e virus, pa aplica e medidanan di siguridad corespondiente.
