Jhon Jairo Velasquez Vasquez, alias ‘Popeye’, hefe di sicario di ken tabata e capo di e Cartel de Medellin Pablo Escobar, a muri ayera na un hospital di Bogota pa via di un cancer di stoma, e Instituto Nacional Penitenciario y Carcelario di Colombia (Inpec) a informa.
‘Popeye’ tabata “hospitalisa desde 31 di december di 2019, y tabata padece di un cancer di stoma”, Inpec a bisa den un comunicado den cual a precisa cu e fayecimento a sosode na Instituto Nacional Cancerologico.
E tabata padece e enfermedad den fase terminal y tabatin metastasis den su dos pulmon, higra y otro organo.
A captura Velasquez dia 25 di mei di 2018, y tabata acusa di “concierto pa delincuencia y extorsion”.
‘Popeye’ nunca a arepenti di su cantidad di crimen, aunke tempo cu e tabata den prizon el a reuni cu algun di su victima of nan famia.
Velasquez semper tabata bisa cu e tabata e hefe di sicario di Escobar y den su brasa e tabata hiba un tattoo cu e frase “El general de la mafia”.
Den varios entrevista pa medionan local el a sigura cu ora e tabata mata un persona “no tabata cuminsa soda ni huma marihuana; mi a mat’e, y a mi bay cas, mi a tuma un baño, mi tabata wak television y mi tabata biba normal pasobra mi ta un asesino profesional”.
Prome cu e lo bolbe na prizon, ‘Popeye’ tabatin mas di 23 aña preso, y den varios entrevista el a manifesta cu el a reintegra den e sociedad.
Den ultimo añanan, el a bira un fenomeno na Youtube, ora el tabata yama “Popeye arepenti”, y pa varios medio rond di mundo cu a entrevist’e e tabata mustra un supuesto actitud nobo y tabata conta su historia na banda di Pablo Escobar.
