Colombia: Piedad Cordoba “Mi ta tene presidente Ivan Duque responsabel si algo por pasa mi”

(El Espectador) – Ex-senador Piedad Cordoba, kende ta candidato pa un stoel den Congreso cu e partido Pacto Historico, den ultimo dianan ta den e wowo di horcan pa via di un rapport di Noticias Caracol riba e testimonio cu su ex- asesor Andres Vasquez a duna na Fiscalia.

Vasquez a señala cu Cordoba a usa su funcion como mediador cu e FARC desmobilisa pa haci calculonan politico cu e secuestradonan. Pa cu esaki, Cordoba a kibra su silencio y a papia pa prome biaha di e acusacionnan aki, cual e ta nenga y ta preparando su mes pa e mesun Vasquez, presidente Ivan Duque, e magistrado Cristina Lombada y su opositornan politico.

Ademas e ex-congresista ta sigura cu no a pensa di sali for di e pais, cu lo sigui su lucha politico y cu no tin miedo cu lo wordo extradita, pa motibo cu e no a comete ningun delito. E ta bisa cu no ta kere den Fiscalia, ta nenga di ta “Teodora” pa FARC y ta señala cu e ta sinti su mes cu tin persecucion politico, pa loke ta pidi garantia pa eherce su derechonan politico y ta responsabilisa Ivan Duque pa su siguridad y di e riesgonan pa su bida den situacion actual cu e ta atravesa.

Ademas el a sigura cu e lo duna di conoce den un comunicado detayenan di con tabata su relacion cu Andres Vasquez, cu ken el a kibra tur vinculo haci varios aña pasa y cu tambe ta acusel’e di usa su nomber pa enrikece su mes y haci negoshinan cu empresarionan, di purba sembra pruebanan falso contra su famia, di a ser condena na 2011 pa desacredita su honor y pa calumnia, ademas pa biba como persona protegi na Miami, cu hopi propiedad y negoshinan.

Entre otro cos e ta manifesta cu su supuesto titulo como “madrina” di e empresario Alex Saab, deteni na e momentonan aki na Merca acusa di ta complice di gobierno di Nicolas Maduro, ta un “shisheria” inventa y el a conta cu el a conoc’e a traves di Horacio Serpa. Tambe e ta reta pa mustra algun prueba di su supuesto mediacion pa e pago di companianan na Venezuela, Colombia of Merca y pa revela e testimonionan di ex-hefenan di FARC na Comision di Berdad y JEP, pa motibo cu nunca e tabata determina secuestronan ni a ricibi beneficionan ni placa di e guerrilla desaparecido.