(infobae) – Comite di experto di ONU den su pronunciamento mas recien a cualifica como “inaceptable” e casonan di impunidad tocante e supuesto abuso di forsa policial durante e paro nacional di 2021; cual a genera un pronunciamento di e presidente.
Cu un pronunciamento fuerte riba rednan social, presidente Colombiano, Gustavo Petro a papia ayera tocante e informe mas recien di e comite di expertonan di ONU, den cual a cuestiona cu, tres aña despues di e paro nacional, considera como un especie di explosion na Colombia, ainda ta registra impunidad riba e papel di e forsa publica den e represion di e mobilisacionnan.
Riba su perfil di X, Petro a pone un lupa riba e conclusionnan di e informe, maske a insisti riba e supuesto utilisacion di gobierno di Ivan Duque Marquez, su antecesor, di e programa di spionahe Pegasus; maske no ta existi evidencia te awo di cu ni sikiera a adkeri e software aki, contrario na loke e mes a denuncia durante un alocucion dia 15 di september.
“No ta atende protesta social como un crimen. Criminalnan tabata esnan cu a consider’e asina. Nan a condena cu prison miles di hoben, cu tortura, perdida di wowo, pa keda vigila ilegalmente cu ‘Pegasus’, violacion di e hobennan, morto. E tratamento pa cu e explosion social ta bay pasa den historia como un di e delitonan mas grave cometi contra derechonan humano na Colombia. Protesta no ta un crimen, e ta un derecho,” Petro a skirbi riba X.
Den un comunicado, e grupo di experto di ONU a manifesta nan “preocupacion profundo” pa cu e ausencia di avance den investigacion y husticia relaciona cu asesinato y violacion di derechonan humano cu a sucede durante e paro nacional na Colombia na 2021. Pa ONU ta necesario pa establece di manera urgente “e berdad, husticia y dunamento di cuenta” debi na e uso excesivo di forsa policial den relacion cu e casonan aki.
Pa e comision a keda proba e incapacidad pa preveni violencia y perdida di bida na man di e agitadornan antiparo. Y den e orden di idea aki, ONU a apunta di manera enfatico riba autoridadnan competente cu den su concepto no a progresa den investigacion, siguiendo parametronan estableci pa yega e fondo di e acontecimentonan aki, loke a cualifica for di tur punto di bista como inaceptable.
“Tres aña despues di e eventonan di 2021, nos ta considera inaceptable cu autoridadnan competente no a avansa den investigacionnan efectivo, segun standardnan internacional, pa descubri e hechonan y responsabilisa e culpablenan. E situacion aki ta permiti impunidad y ta pone e victimanan y nan famia den mas riesgo di menasa contra nan bida y seguridad,” a precisa den e comunicado.
