(infobae) – Memey di polemica pa e fraude electoral na Venezuela, congresista Mericano, Alexandria Ocasio-Cortez a duna comentario riba su cuenta di X, loke a hala atencion di e mandatario Colombiano.
Ocasio-Cortez a referi na e necesidad di revela e actanan di votacion cu ta duna evidencia di e resultadonan di eleccion dia 28 di juli ultimo, di cual Conseho Nacional Electoral a declara Nicolas Maduro como ganador.
E pronunciamento di Ocasio-Cortez a hala atencion di presidente Colombiano, Gustavo Petro, kende a sigura di ta di acuerdo cune. Desde su perspectiva, e actanan di Conseho Nacional Electoral di Venezuela ta clave pa garantisa transparencia den e disputa electoral. Ademas, probechando di e debate cu a surgi al respecto, el a urgi e congresista pa traha tambe pa stop e “exodo migratorio.”
“Manera tambe ta fundamental pa Alexandria y su bancada progresista por yuda nos den laga sociedad Mericano completo compronde cu e manera mas eficaz pa stop e exodo migratorio ta pa logra un gran pacto Americano cu ta contempla democracia, paz y progreso di e pueblonan di Sur,” e presidente a indica.
A pesar cu e hefe di estado a reitera e necesidad pa Venezuela revela e actanan di votacion pa identifica si den efecto Nicolas Maduro a gana eleccion presidencial, varios politico a critica e gobierno pa un contradiccion. Gobierno di Petro a abstene di vota den OEA pa, mediante un resolucion, exigi regimen Venezolano e publicacion di dicho informacion.
E presidente a sigura cu, maske e postura di e pais ta sigui mescos, un gobierno stranhero no ta den competencia pa tuma decisionnan riba ken mester ta presidente di e teritorio nacional. “Ta e Venezolanonan na ken ta coresponde pa yega na un acuerdo politico,” el a indica.
