(infobae) – Igual cu na Colombia, gobierno Argentino, lidera pa presidente Javier Milei, a determina salario minimo a traves di un decreto despues cu no a yega na un acuerdo entre e sindicatonan di trahado y e empresarionan.

E prome mandatario Argentino a revela cu e aumento ta bay ta realisa di manera gradual, pa loke desde januari di 2025, lo pasa di ta 286.711 peso Argentino (alrededor di 286 dollar); e lo cambia for di dia 1 di februari pa 292.446 peso (292 dollar), y na maart e lo subi na 296.832 peso (296 dollar).

Sinembargo, un idea di Milei pa elimina salario minimo na Argentina a causa polemica. Vocero presidencial, Manuel Adorni a sigura cu pa e administracion actual no ta necesario pa mantene e base salarial aki, ya cu tin hende na e pais cu ta dispuesto pa traha pa menos pago.

“Conceptualmente, tin un salario minimo ta un eror, pasobra si tin hende cu ta dispuesto pa traha pa menos di e salario ey, e plan no ta permiti contrata e persona pasobra efectivamente no por pag’e menos di e SMVM,” e funcionario a splica.

Pa cu e palabranan di e vocero presidencial, presidente Colombiano, Gustavo Petro a usa su rednan social pa expresa su opinion tocante e propuesta di Javier Milei.

Pa Petro, e medida di e presidente Argentino ta responde na un manera di explotacion laboral den cual e ciudadanonan di e pais en cuestion lo ta e mas afecta, ya cu no lo tin regulacion pa cu e pago cu nan lo ricibi pa nan servicio.

“Salario minimo Argentino ta e penultimo di America. No tin salario y extende e jornada na e maximo posible, esey ta e paraiso di capitalismo salvahe. Tambe ta yama e modo di produci aki: sclavitud,” Petro a skirbi.

Di mesun manera, el a sostene cu e propuesta di Milei ta impulsa sclavitud y ta bay contra derechonan humano di e hendenan na ken mester garantisa libertad den tur espacio, incluyendo na ambientenan laboral. “Tin esclavo cu ta gusta di ta esclavo, pero ta di e condicion di ser humano pa ta liber,” Petro a insisti riba su cuenta di X.

Petro tambe a gaba di e logronan di su administracion den e indicadornan principal, manera desempleo na su pais. Segun e presidente, nan ta un “regalo di Aña Nobo,” ya cu ta e cifranan mas abao registra den ultimo siete aña. Den e sentido aki, el a destaca cu na e ciudadnan principal di e pais, desempleo ta mantene bao di 9 porciento.

“Nos tin e cifra di desempleo mas abao pa luna di november desde aña 2018. Desempleo na Colombia: 8.2 porciento. Desempleo na e 13 ciudad mas grandi: 8.0 porciento. Desempleo na Medellin 7.4 porciento.”

Incluso el a sigura cu, cu aumento si salario minimo cu empresarionan a opone na 2023, a contribui na progreso na lugar di perhudica empleabilidad na e pais.

“Salario minimo real a subi na 2024: 4.4 porciento real y contra e tesis di e auto-denomina ‘experto’ di television priva y e hefenan di gremionan patronal, desempleo no a aumenta, sino cu a baha,” el a indica.

Pa motibo di falta di concertacion entre gobierno nacional, empresario y sindicato di trahador, presidente Petro a determina e salario minimo nobo a traves di un decreto, pa loke for di dia un di januari 2025, ta bay tin un aumento di 123.500 pesos, cu ta ekivalente na 9.5 porciento.

E asignacion nobo ta bay ta di 1.423.500 pesos. Ademas, subsidio di transporte a aumenta cu 38mil pesos, pasando di 162mil na 200mil, loke ta nifica cu e salario minimo nominal nobo, incluyendo e subsidio di transporte, ta keda na 1.623.500 pesos.