(EFE) – Presidente Colombiano Gustavo Petro, a acusa fiscal general, Francisco Barbosa, di duna un “golpi contra constitucion,” despues cu e entidad ey a pidi na Comision di Acusacion di Camara y otro organismo pa investiga e financiamento di su campaña electoral di 2022.
Petro a contesta den un comunicado publica pa Fiscalia dialuna ultimo den cual ta señala cu a notifica na organismonan di control riba e presunto entrada di placa no declara na su campaña presidencial, den base na declaracionnan di su yiu mayor, Nicolas Petro Burgos, ken ta procesa pa labamento di activos y enrikece su mes di manera ilicito.
“Fiscal general ta pone pruebanan contra mi, basa den un interogatorio no legal na unda e persona di e entidad cu a interoga ta haci preguntanan riba mi persona, cuestion cu ta un golpi berdadero contra Constitucion, pasobra mi tin fuero, como senador na e tempo ey y awor como presidente,” Petro a manifesta.
E mandatario tambe a critica cu “di un manera teribel, un revista ta publica e interogatorio di mi yiu, ora ley no ta permiti publicidad di e documentonan ey cu di manera iresponsabel y delictivo a ser entrega.”
Diasabra ultimo, revista Semana a publica e videonan di un interogatorio di Fiscalia den cual Petro Burgos, yiu di e presidente, a revela cu su tata si tabata sa di e supuesto placa iregular cu a drenta den e campaña cu e cual el a gana eleccion na 2022.
Den un aparente afirmacion cu si tabata conoce loke a pasa, Petro a critica cu ni Fiscalia ni e revista “ni sikiera a comproba e fecha di loke a pasa pa check si den e acto ey di “P” na Barranquilla, tabatin ley di financiamento di campaña.”
Esaki ta referi na un acto cu a tuma luga dia 10 di september di 2021 na Barranquilla, unda e escenario tabata decora cu un letter P grandi di color cora unda Petro e reuni cu su siguidonan.
