(LaPatilla/ElPais) – Gustavo Petro ta preocupa cu den proximo dianan, Edmundo Gonzalez por presenta di sorpresa na frontera cu Venezuela. Team di e politico cu a derota Nicolas Maduro den eleccion, segun pruebanan presenta, ta considerando pa mas cu un luna pa realisa un gesto na Cucuta cu lo reforsa su intencion pa yega Caracas y tuma posesion como presidente electo.
Colombia no lo pone ningun impedimento na entrada di Gonzalez na e pais pa respet na su condicion di asilado, mas cu desconseh’e. Pero segun un fuente di nivel maximo di gobierno, si e yega, lo recomend’e pa no comete ningun temeridad, manera expone su mes den e limite cu ta separa un pais for di e otro.
E eventual yegada di e opositor lo ta un dolor di cabes pa Petro. E presidente tin un siman ta haci ekilibrio pa denuncia cu ta comete violacion di derecho humano na Venezuela y na mes momento defende cu eleccion no tabata totalmente liber pa sancionnan internacional – cu e semper a yama “blokeo.”
A pesar cu su number 2, Laura Sarabia, y canciyer Luis Gilberto Murillo a purba convenc’e pa no manda representacion na e autoproclamacion di Nicoals Maduro como presidente, diabierna, su postura tabata inmovible y el a mantene cu lo miho tabata pa manda e embahador na Caracas, Milton Rengifo. E diplomatico a biba dianan di angustia.
Su enemigonan ta bisa cu Petro ta alaba e dictadura y ta amigo di Maduro – algun hasta ta papia di historia di amor. En realidad, ni Petro ta confia Maduro, ni Maduro Petro. Ora Petro a purba convence Maduro pa firma un acuerdo politico di respet pa e resultadonan, Maduro a bisa cu condescendencia cu lo estudi’e y despues a ignor’e. Memey di e reestablecemento di relacion diplomatico, Petro y Maduro a sostene siete encuentro entre november 2022 y november 2023, pero ya ta mas cu un aña cu nan no ta reuni. Hunto cu Lula, Petro a lansa na su momento e posibilidad di un gobierno di coalicion transitorio y eleccion nobo como garantia pa tur como salida pa e crisis. Maduro no a ni atende esakinan.
Colombia nunca a reconoce e supuesto victoria di e heredero di Hugo Chavez, a pesar cu algun ta interpreta – talbes cu rason – cu presenta na e ceremonia tabata un manera di reconoc’e implicitamente. Canciyer Murillo semper a defende cu e relacionnan ta “di estado pa estado” y cu loke ta responsable cu e habitantenan di e frontera ta prudencia.
Esey ta e posicion di gobierno, fiha pa e presidente. Pero Petro ta sabotia su mes den reacionnan inmediato y poco medita cu e ta publica riba X. E tabata un defensor di eleccion y awo cu tor a sali mal, ta tilda nan di ‘eror’, ta sigura cu no tabatin condicion y ta bolbe insinua otro proceso di negociacion. Su intencion no ta pa kibra cu Maduro, pasobra e ta kere cu ta desprotege e Colombo-Venezolanonan – cada banda di e frontera; ta perhudica economia y ta isola Venezuela ainda mas. E posicion aki por bula den laira cu e potret di Edmundo Gonzalez na e frontera, den un gesto simbolico di gran peso.
Fuentenan di alto Gobierno ta recorda cu Colombia tin un tradicion amplio di respeta e figura di asilo, cu e propio presidente Petro a exalta den mas di un ocasion. Pa e status di asilado aki, ta sigura cu niun hende lo prohibi e ingreso di Edmundo Gonzalez na Colombia, ni lo pone obstaculo, mas leu cu desaconseh’e di cualkier accion peligroso. Y den caso cu e opositor mantene firme, lo insisti pa no pone su bida den riesgo.
