(infobae) – E acusacion di acoso sexual na man di delegadonan di gobierno nacional di Colombia na e di 27 Conferencia di Nacionnan Uni riba Cambio Climatico (COP27) ta continua generando reaccion. Despues cu reaccion di minister di Interior, Alfonso Prada a bira conoci, e propio presidente di e Republica, Gustavo Petro a bin dilanti riba e tema mencionando cu ta trata di un “calumnia” pa desacredita su gobierno.
El a confirma cu ningun di e acusadonan ta parti di e delegacion ni di e administracion.
“Esaki ta un calumnia. E presidencia no tin delegado. Y e acusadonan no ta ni di presidencia ni funcionarionan publico”, Petro a skirbi riba su cuenta oficial di Twitter.
Di su banda, Senador di Pacto Historico, Gustavo Bolivar a pidi e presidente revela identidad di e implicadonan den e scandal, “pa disipa duda”, el a indica.
Usuarionan riba rednan social a señala algun critica, entre nan, cu for di Canciyeria mester coregi e informacion di e comunicado riba nan pagina, cual ta señala: “E Secretaria di Convencion Marco di Nacionnan Uni Riba Cambio Climatico, den marco di e di 27 Conferencia di e Partinan cu ta realisa na Sharm el-Sheikh (Egipto), a informa gobierno di Colombia tocante e denuncia contra dos miembro di e delegacion oficial di e pais na e evento aki pa supuesto acoso sexual.”
Reaccionando na e palabranan di e presidente, nan ta puntra ken e persona tabata, y ken tin rason, si e presidente of e Canciyeria.
Minister Prada a indica cu ta confirmando identidad di e acusadonan. El a bisa cu a ricibi nomber di un di e acusadonan pero a verifica cu e persona en cuestion nunca a biaha, pa loke por a usa credencialnan Colombiano ilegalmente. Prada a ratifica cu e organisadornan di e evento si a solicita canciyeria Colombiano pa retira acreditacion di e dos persona implica, pero a aclara cu no ta trata di ningun funcionario di gobierno nacional.
Sinembargo, e minister a agrega cu nan ta wardando pa e organisadornan constata e nomber di e acusadonan.
