(EFE) – Presidente di Colombia, Gustavo Petro, diahuebs ultimo a pidi na su homologo di Merca, Joe Biden, mas boto y drone pa stop e narcotraficantenan na e pais sur Americano.
Den declaracionnan pa prensa despues cu a reuni cu Joe Biden na Cas Blanco, Petro a splica cu ambos presidente a papia tocante “e guera contra droga” cu e Colombiano ta considera cu “a fracasa” y cu for di mey siglo pasa a bin marcando un bon parti di e relacion entre Merca cu Latino America.
“Un cos ta fumiga un mata y hendenan cu ta debil economicamente, y otro cos ta persigui empresanan di narcotrafico, algo cu ta haci parti di labornan di inteligencia, ta persigui nan bienes y nan placa,” el a sigura.
Siguientemente a bisa cu pa persigui e hende aki ta necesario un enfoke nobo pa enfrenta e problema di droga y a expresa su preocupacion pa aumento di cultivo di coca na Colombia.
Cultivo di coca na Colombia a crece un 43% na 2021, aña den cual a registra 204.000 hectar sembra mientras cu na 2020 tabata di 143.000 hectar, segun e ultimo rapport di Oficina di Nacionnan Uni contra Droga y Delito publica na 2022.
Despues di su bishita na Cas Blanco, cu a tarda casi tres ora, e mandatario Colombiano a firma e buki di bishita, reserva pa personanan cu ta drenta na e edificio pa reuni cu presidente di Merca of funcionarionan gubernamental.
“Cu nos lucha por logra e paz, bida pleno, un democracia mas profundo y multicolor y husticia social pa esnan mas debil,” por lesa den buki hunto cu e firma di Petro segun un potret a señala.
