(EFE) – Ayera diaranson un hues Colombiano a condena cu 25 aña y seis luna di prison e rumannan Colombiano, Andres Felipe y Ramon Emilio Perez Hoyos. Nan a acepta nan participacion den e planeamento, financiamento y logistica di e asesinato di fiscal Paraguayo, Marcelo Pecci cu a sucede na mei di 2022 na un beach di Caribe Colombiano.
Asina a informa e apoderado di famia Pecci, abogado Francisco Bernate, ken a bisa cu Husgado Cuarto di Cartagena a informa di e condena riba rednan social y cu e rumannan “no a apela e decision.”
Pecci, asesina dia 10 di mei di 2022, tabata un di e fiscalnan anti-mafia mas importante di Paraguay. Dos sicario riba un jetski a mat’e ora e tabata na un beach di un hotel di isla Baru celebrando su honeymoon cu su casa, e periodista Claudia Aguilera.
Na januari ultimo e rumannan Perez Hoyos a acepta nan participacion den e planeamento, financiamento y logistica den asesinato di fiscal Pecci, pa loke hues a impone na nan prison preventivo debi na e riesgo cu nan por huy di e pais.
Fiscalia a impone e delitonan di homicidio agravado, fabricacion, trafico y porte di arma di candela, accesorio, parti of municion agrava, delitonan cu e dos ruman condena a acepta.
Segun Fiscalia, e dos homber supuestamente tabata forma parti di un organisacion criminal di alcance transnacional cu por tin su basenan na Paraguay.
Ademas, e investigacion a determina cu e dos ruman Perez supuestamente a tene varios reunion – den cual nan a asisti cu un pickup shinishi, cu ta confisca – cu otro personanan involucra den e homicidio pa duna nan insumo y detayenan.
A captura e dos ruman na Bogota y Rio Negro, na departamento di Antioquia, acusa cu nan ta esnan cu a contrata e autornan material di e asesinato.
