Partido Fuerza Alternativa Revolucionaria del Comun (FARC) diadomingo ultimo a denuncia e asesinato di otro ex-combatiente di antiguo guerrilla na municipio Miranda, na departamento di El Cauca.
“A asesina Manuel Alonso di 55 aña, conoci na antiguo FARC-EP como Romel of Carmelo. A wordo haya morto na municipio di Miranda, Cauca”, FARC a informa riba nan rednan social.
Segun informacion comparti pa e partido politico, loke a surgi despues di Acuerdo di Paz cu a wordo firma entre Gobierno y FARC na november di 2016, cu e asesinato di Alonso ya caba tin 248 homicidio contra ex-combatiente desde cu guerrilla a wordo desarma.
“Cune ta completa e lamentabel cifra di 248 soñonan di paz cu a wordo apaga. Enemigonan di paz no ta descansa. Nos condolencia”, FARC a agrega.
Riba e crimen aki, Gobierno Colombiano a sigura 25 di november ultimo cu a nan a actua “cu diligencia” pa protege ex-guerrillero di FARC cu a laga nan arma den un audiencia den cual Juridisccion Especial di Paz (JEP) a scucha e halto funcionarionan y partido riba e violencia contra e firmantenan.
Den diligencia hudicial aki FARC a insisti cu ta existi un “genocidio” contra nan militantenan y a acusa Gobierno di presidente Ivan Duque pa tin un dobel discurso pa paz y pa no detene e “plamamento di sanger” cu ta afecta nan.
Di su banda, vice-fiscal general, Martha Yaneth Mancera, a puntualisa cu Fiscalia dia 11 di november tabatin den nan registro 280 persona cu a wordo reincorpora cu afectacion, cu homicidio, tentativo di homicidio of desaparicion forsa.
Den ocasion aki, director di Unidad di Investigacion y Acusacion (UIA) di JEP, Giovanni Alvarez, a adverti cu “si e tendencia aki lo sigui, na december 2024 lo tin 1.600 ex-combatiente di FARC asesina”.
