Partido politico Colombiano Fuerza Alternativa Revolucionaria del Común (FARC), cu a surgi cu e desmobilisacion di e guerrilla, a cambia su nomber y awor ta yama Comunes, diadomingo ultimo miembronan di e movemento aki a anuncia.
“Nos a caba di haci e cambio di nomber di nos partido, cu for di awor ta yama partido Comunes”, e senador Griselda Lobo, conoci como “Sandra Ramirez”, a publica den un video riba su rednan social despues di e segundo Asamblea Nacional Extraordinario di e movemento aki despues di su desmobilisacion.
E congresista a detaya cu e nomber aki a wordo eligi den un votacion entre tres opcion proponi, cu tabata completa e “Unidad Popular Comun” y “Fuerza Comun”, y cu loke nan ta busca desvincula nan mes di e antiguo guerrilla.
“For di awor nos ta Partido Comunes, un partido pa e construccion di paz y pa lucha pa un Colombia Nobo”, Pastor Alape, delegado di e movemento aki a expresa den Conseho Nacional di Reincorporacion (CNR) na Twitter.
Na augustus di 2017, nuebe luna despues di e firma di paz, antiguo guerrilla a defini den un congreso cu su nomber politico lo a bay ta Fuerza Alternativa Revolucionaria del Común (FARC), y su logo, un rosa cu ta nifica e signo demócrata.
Sinembargo, distinto sector di e pais a critica e decision di antiguo partido FARC di sigui usa e siglanan ey despues cu a laga e armanan pa motibo cu tabata inevitabel e vinculo cu guerrilla, algo cu nan dirigente mes ta reconoce.
Den sentido aki, e presidente di e partido, Rodrigo Londoño, conoci den su epoca di guerrillero como “Timochenko”, a propone pa militarnan di FARC cambia di nomber di partido y a pidi pa nan pa propone otro nombernan den asamblea.
For di diabierna y te diadomingo e partido a realisa un asamblea extraordinario den cual e topiconan di debate tabata e cambio di nomber, logo, y representante legal; e nobo programa di movemento y eleccionnan di aña 2022.
