(EFE) – Un nochi di teror y caos a biba e ciudad Colombiano di Tulua den e cual Palacio di Husticia a wordo kima cu candela pa un grupo di persona den un jornada di protestanan protagonisa pa blokeonan y violencia.
“Cu dolor den mi alma, mi ta rechasa e actonan di vandalismo cu a golpia e dia aki. Tulua tabata un ehemplo na nivel nacional cu su comportacion durante e actonan di e protesta pero awe el a wordo vandalisa”, e alcalde di Tulua, John Jairo Gomez a bisa ayera diaranson den un pronunciamento publico.
El a agrega cu “Lamentablemente un grupo di persona sin amor, sin respet pa e ciudad y pa otro personanan a vandalisa e ciudad, a causa daño den infrastructura di transito, como luz di trafico y señalnan, a vandalisa y destrui un edificio asina importante y bunita, emblematico y historico Palacio di Husticia”.
E candela a destrui casi tur e structura di Palacio di Husticia di e ciudad aki, ubica na departamento del Valle del Cauca, 94 kilometer na nort di Cali, capital regional y epicentro di e manifestacionnan cu a cuminsa 28 di april ultimo contra Gobierno di Ivan Duque.
E personanan responsabel tambe a wordo señala di ataca oficina di Alcaldia di e ciudad, Departamento di Apicultura y Departamento di Transito, asina como “nan a afecta e patrimonio di hende emprendedor, di empresarionan cu ta genera trabou na e ciudad atacando nan negoshinan na e centro”, Gomez a detaya.
Diamars ultimo Tulua a biba momentonan hopi tenso cu enfrentamento entre forsa publico y gruponan protestante cu episodio di caos urbano den un jornada nobo di protestanan cu ta sucede na tur e pais.
Segun e alcalde a splica, enfrentamento a cuminsa desde mainta ora autoridadnan a detene algun muchanan menor di edad “di manera preventivo despues di e recuperacion di mobilidad na zona nort y sur di e ciudad” cu tabata blokia.
